Ieng Huna Um Am Ei Ni A? (II Pet. 3:8-10)

~ Lalthanglien, Saidan (Thuhriltu Vol.XLIX/No.01/January/2021)

Ei thupui hi Pathien Thutak, II Pet. 3:8-10 thangsanin, “Ieng hun a um am ei ni a? ieng thil am ei tuok ding, khaw tiem ei fe pei ding a na?” ti hi kohran haiin  hei sui thar inla ti ei nuom a nih.

Genesis 19:17 ah Lota chu I hringna dingin tlan suok rawh, ti thu vantirkohai anthawkin a dawng a, a tlanna ding khawm khi tlanga khin tlan rawh chutaka chun hring i tih, ti a nih.

Lota ruokchun, a hla taluo khi tlanga khin chu tlan thei naw ning, ka ta ding chun sietna ning a tih a ti a. A hringna ding chu a sietna ding angin a hmu tlat. Sawtaka khuoa sawn mi phal pek rawh; chutaka chun in a um bawka khuo chite an nawm mani a ta. Zoar khuo an ti a chun mi phal pek ro a ta. Chuonga i ti leh tlan rawh an ta, Joar hmun a chun a tlan ta a. Chu hmuna chun an khawsa ta a. A nau nuhmei hai pahni chu an inrawn a. Enta, khawvela hin mihriem an um ta nawh, ei pa hi suon mawnga a um nawna dingin; thaw rawh, ei pa hi uoin indawntir ei ta, vawizan kei va lut kata, zan nawk nang  va lut ve nawk rawh an ta. Chuongang chun an thaw ta a. Hilaia ei zuk lak nuom chu, an paa inthawkin nau an vawn ve ve a. Chun Lota chun a nauhai  hung zal a hriet naw a, an thonawk khawm a hriet bawk nawh. Mani dit thlangnaa tlan Lota chun ieng thil am a thaw a na, ti hi; ama khawma a hriet suok zo ta nawh; ieng pawi am a tawka ti khawm a hriet dawk zo ta nawh.

Ei hun tawng mek hi ieng hun am an ta a ti ei hriet phak ta nawh. Ei hriet phak sun chu hripui an leng a, ei inkhawm thei ta naw a, mipui um bum awi an naw a, hmur tuom ding a nih, ti hai hi a ni deu tak tah. Ei hriet po khawm chu chu a na, chuleichun – ieng huna um am ei ni ta? Lalpa chatuon rorelna chu  iengtinam a fe pei ding  a na, ti Pathien Thutak  mi hril hi kohran haiin ei hriet thar a tul tak  zet a nih. Ei Pathien Thu hin hi hi a hril a nih. II Pet. 3:8 Nisienlakhawm  dittak hai hi thu bau khat hi theinghil naw ro, thu bau hni bau thum a ni pha chun thei nghil a awl a, bau khat ruok hi chu thei nghil antak hlak a nih. Ei Pathien Thu in bau hni bau thum khawm a min cha naw ie, Hi thu bau khat ku hi theinghil naw ro. Tu ha’m an na a theinghil nawtu ding hai chu? Dittak hai kalvari thisena an tlan hai, a nau dittak nang le kei a kuoma  an cha  a nih. Chu thu chu ieng thu am a na? Chang 8 na –Lalpa ngaia chun kum sang khat hi nikhat ang a na, Hi thu bau khata ti a nih. Ei tawng mek hi Ni iengzam ning a ta, kum ieng zam la ning a ta. Mi thenkhatin, muonga an ruot angin Lalpa chu a thu tiem kawnga chun a muong nawh. Mi po po lo sim a nuom leiin nangni tieng chun a dawthei a ni, ti hi ei Pathien thu’n kohran hai a mi’n cha chu a nih.

Ieng huna um am ei ni ta a? Mi thiem hai chun hunbi pasari in an lo the a.  Nova hun a inthawka Abraham hun chen kha hun khatin an the a. Chu chu Pathienin mihriem a fiena hun thumna nia hril a ni a. Chu fienaa chun mihriem chu an tling zo naw a. Chuleiin, Tuilet hmangin Lalpa’n khawvel a sukthienghlim a.

Hunbi thar hung intan nawkin Abraham kuomah, Abraham suok rawh, ti a nih. “I khuo le veng hai a inthawkin suok rawh,” tiin Abraham chu a ko suok a, Abraham a kuoma chun Lalpa’n thutiem, thuthlung a pek leiin hi hun hi Thutiem Hun tia hriet a nih. Thutiem hun khawm chu mihriem tlingnawna bawkin a tawp a. Thutiem hun chu a tawp a, hunthar, fiena hun dangah Lalpa chun chieng lemin mihriemhai a hung inbiekpui ta a.

Chu hunbi thara chun, Lalpa’n Mosie hmangin mihriem hai zawm dingin Dan thatak el a hung pek nawk ta a. Mihriem suolin a lo chiezawp ta hai ta ding chun chu Pathien felna dan zui famkim chu thaw ngaina a um naw leiin Dan chu mihriem tling nawna suklangna chau a hung ni nawk ta lem a nih.

Hunbi pangna chu Isu Krista a Kross-a a thina chun suktawp a hung ni ta a. Isu Krista thlana inthawkin a thonawk a, vana a lawn hnungin a thutiem angin Thlarau Thienghlim chu khawvel awptu dingin pekin a um ta a, hunbi thar a hung intan nawk a. Chu hunbi thar chu tuta kohran hun, mihriem tiengpang thaw ding phut um ta lo a, lunginsietna ringa sandamna changtheina hun a ni leiin Lunginsietna Hun tia ko a nih. Vawisun hunbi  kum 2020 a hung ni ta a. Kum 2000 kha kum 1000 peia tiem ding niin kum 2000 kha khawvelin kum 2000 a lo chuong tan na a na. Hun bi 6na  hi lunginsitena hun a ni angin Bible a hun suitu hai khawmin a huom chin ding an hril thei chuong nawh.

Pathienin ni khat nia inthawkin ni 6 chen thil a siem a, ni 7 ni chu Sabbath hun thienghlim a ni leiin in ser ding a nih. Kum 6 sung sin thawng inta mal sawm ka ti cheuva kum 7  kum ruok hi chu chawl kumin inpuong ding a ni ti chu Pathienin Israel hai kuoma a hril a nih. Chuleiin, hunbi 6na a hin chu mihriem hai chanvo a na; hunbi 7na ruokchu Lalpa Ni thienghlim  a nih. Thup. 1:10- chun Lalpa ni a chun thlarauin ka lo um ta a, tiin Patmos thlierkara hmangai Johan chun a lo hril a.  Hun 6na hi chu mihriem ta dinga ruot a nia, hun 7na ruok hi chu Lalpa chanpuol a nih.  Kum 2000 chen khawvelin  a hmang ta a. Kum 2000  a inthawk tiem tanin kum 2020 ei chuong kai el ta hi, ieng hun am ni tang a ta? ti hi ngaituo khawp tling in ka hriet.

Thupuongsuo 11:1 chun, luong hmawl ang hi pekin ka um a, chuongchun, tu in amani tho la Pathien biekin le maicham chu inkhi la, a sung biel hai khawm tiem rawh. Biekin puotienga in huonna sung tuol lai ruok chu inkhi sa naw, Jentel hai ta dinga hmun ruot a nih. Jentelhai ta dinga hmun ruot hi ieng hun am ni tang a ta?  Mi po po lo sim a nuom leia Lalpa’n eini tieng a la dawthei hun, tuta ei hmang mek lunginsietna hun lieu lieu an nawm a ni ti hi kohran haiin ei sutzawm dingin tha ka ti ngawt el. Rom. 13:12- zan hi a bo vang vang tah a, khuo a var ding a ni tah, ti ei hmu. Pathien Thu’n kohran hai a mi hril a nih; Lunginsietna hun, Jentelhai ta dinga hun ruot hi inkhisa lo ram a ni si a. Iengtikam a tawp ding a na, ti hi a hrillawk le hrethei ei um der si naw leiin inring zinga um hun a ni takmeu a nih.

Hun tlawm te Lalpa’n a mi pek a.  Hri le hrai  haiin an mi tuom a, harsatna mak tak tak el ei tuok a. Hi huna hin Lalpa ni Thienghlim hung inlang ding hi tuok dingin ei inzo tam, ti hi ei in enfie theina dingin le mi po po lo sim a nuom leiin Lalpa dawtheina chun a mi la nghak  a nih.

Hun la tlung lo, la hung tlung ding mihriemin a pumpel thei der lo ding hun a ni si a. Hun bi tawp tawma thil tlung ding Lalpa Isu’n a hril hai kha iem an na? Luka 21: 10-11 ei tiem chun, Hrihai inleng a ta ti thu ei hmu a. Vawizan chena ei Biekin a kawruok el ta dam, Lalpa le inpawlna, kohran hai le inpawlnaa lut ngam um ta lo. Tuol sung reng reng hrisel ta lo, ei inti tawn el chu an ta hi. Ngaita ka hung vat ding an nih, tia a mi khek khumna a nih. A hung vak ding an ta leiin hun bi lalram ei hung sui chun  vawizan a ei hun tuok ku hi, mi po po lo sim  a nuom leia Lalpa’n eini tieng zai a la daw sunga mihriem lungril umdan ding Bible in a hrilsa vawng a nih.

II Timothe 3:2-5 Hun hmawr tawp tawm, tawtawrawt in ri tawm, khawvel tawp tawma mihriem lungril put hmang ding: mi  mani inhmangaitu dam, a hung ti a um bawk a. Vawizan hin mani inhmangai chu a zie an la um deu, mani inhmangai zo ta lo Biblein a hril sa lo ram suola khawm ei chuongkai ta. Ei huntawng meka hin an la um ding a ni ti Biblein a mi hril hai laia chun ka thang el am aw? i thang ve el am aw? ti hi  vawizan hin mani infie seng ei tiu.

II Timothe 4:4- An na chu thutak tieng set tang a ta, tienami thu mei mei ngaiven lem tang an tih. An ngai nuom zawng, an ri hriet nuom zawng, hi khawvel thil ni tang a tih. Tirko Paula’n Timothe kuoma chuong mi hai chu maksan rawh, ti’n an fui a. Bible-in khawvela thil tlung ding a hril hai, mihriem lungril put hmang dinga a hril lawk hai a tlung mek a. That nuom derlo hung suok an ti, ti hai a tlung mek. Mitin lungrilah hmangaina dei zo tang a ta, ti a lo hril hai a tlung mek. Khawtlanga nisien kohrana khawm nisien, ei in chawimawi dan hai hang en tum! Kristien um naw dan dingin ei um rawn lem ta niin an lang. Kohran ram hai khawm hi hang en tum. Mitin lungrila hmangaina deizo tang a tih, a ti ang elin in hmangai ngawi ngawina a um ta nawh. Lungril lova inpawlna ram, lungril indiktak phawr nuomna ram umta lova lemchangna ram, hlimnthla rama hin ei tlan nasa taluo tah. Hun tawp tawma mihriem nungchang ding Bible-in a hril sukdikin a um rawn taluo ta. Chuleiin, hla phuoktu’n: “Lo ngai ro kan khek rin khawvar Ar a khuong ta. Hmu nuom chu har sien la, Hrie nuom chu umhmun insawn raw se.” tiin. Lalpa hun bi thar hung inlang dinga thil thar hung inlang ding, a hmu nuom hai ta dinga thanghar theina dingin chatuon archal vantirko hai an khek mek. Bible, Pathien Thutak a khek suok zing a. A rawngbawltu hai thuhriltuhai khawm hmu nuom chu har sien la, hrie nuom chu umhmun insawn raw se’n an ta. Amiruokchu entu chun ka ngai dan, ka dit dan, ka tha ti dan tiin intiveina mani inngaihlutna in ei lo tlei zo lem ta nisien a hawi.

Ieng huna um am ei ni ta a. Mithenkhatin muonga an ruot angin Lalpa chu a thu tiem kawnga chun a muong nawh, mi popo lo sim a nuomin nangni tieng a daw thei lem a nih. Tawtawrawt ri in a mi nang huna ei buoi sie nawna dingin Lalpa’n  inkhi sa lo ram a mi pek a, ka that hun ka fel hun nghaka van kawt a mi hawng pekin lunginsietna hun Lalpa’n a mi keisei pek a nih, ti hi kohran hai ta dingin hriet a pawimaw em em.

Isai 21:11 Mi’n Seir tlanga inthawkin an mi ko a. Ralvengtu, zan hi ieng chen am a liem ta a? Ralvengtu, zan hi ieng chen am a liem ta a? tiin. Ralvengtu chun, zingkar a ni ding a ni ta, zan khawm ti in, dawn nuom chun, in dawn ro. Nghakir nawk unla hung ro a ta.

Mi’n Seir tlanga an mi kova, a ti ang el in. Bible tlang sipa inthawkin Martyr hai thisen in an mi kova. In hun hi ieng hun am a ni tah, tiin. Lal Isu an in dawn a, zing a ni ding an tah. Indo thu thang hai hrieng in ta, hri hai inleng a ta, Mani lawmna chau hmangaitu dam an ni ding a ni, tiin. Kohran sunga khawm lang thei ram chaua suol theida a, a ruka pawisak nawna hai, chuongang khawvela chun ei chuongkai tah. Hming a la thlang ding an leiin, ei sungkuo ei kim chie dim? Covid-19 laka ruokchu Lalpa’n mi veng him ngei a ta ti hi ka beisei tlat a. Chungtienga kona ruokchu ei hrietkim tawl ngut ding maw!

Chatuon khuo hung vara khawvel hung inthlak danglam thut ding hi Covid-19 neka ei ngai pawimaw ding, kohran haiin ei ngaiven lem ding a nih. Him naw pal ka tih, tia mani seng ei in enfie a tul ta hle naw maw? Vawizan hin Lalpa inpuongna tlak ni ta lo mi iengzam um tang ei ta? Mani thu hai ei ngai ropui lem a, Pathien Thu nekin mani dit dana Pathien thu in umtir ei tum ei tam ta bawk. Tawtawrawt in ri tawma mihriem nung chang Bible-in a hril hi ei suk dik tak meu a nih. Ei umna khawvel hi tawp chin nei dinga Lalpa’n a siem a ni si a, ei lam hraw hi nikhat chu a la tawp ding a nih. Lunginsietna hun, Jentelhai ta dinga hun ruot, inkhi sa lo ram, zangaina hun, Lalpa’n dawtheitaka a mi nghak sung hin mani seng in enfieng ei tiu. Lalpa’n a thu malsawm raw se.