I PUON IN HMUN CHU ZAU RAWH (Enlarge the Place of Your Tent)

~ Rev. Paozathang Singson, General Director, ECCI

Isu Krista Kohran Inthieng hai po po ECCI Office a’nthawkin Kumthar Chibai ka hung bûk cheu. Pathien lunginsietna lei chauin kumthar (2022) ṭhuoi tlungin ei um ta a. Hi kum hi ECCI huom sunga Kohran po po hai ta dingin kum ṭha, hlimna le lâwmna thar intluntu le malsâwmna le hlâwtlingna tamtak inchang kum nisien tiin Pathien kuomah ka ṭawngṭâi a nih.

Pathiena inthawk thilṭha chau beiseia hringnun ei hmang chun, harsatna ei tuok chângin beidawngtakin ei um ding a nih. Pathien lunginsietna leiin thilṭha le a malsâwmna tamtak chang dingin inbeisei ei ta. Amiruokchu, ei hringnun lamtluong a hin hasatna ei tuok ding khawm a phal a nih, ti hi theinghil naw inla nuom a um takzet. Ei hringnuna harsatna le lungngâina ei tuok hai hi Lalpa Pathien tirko a ni ti hrie in, hmatieng pan pei dinga inzosaa um seng dingin ka hung infûi cheu.

Kumthar, hunthar ṭhuoi tlunga ei um le inzawmin ECCI Kohran in tukum, kum 2022 thupui dinga a ithlang, “I PUON IN HMUN CHU ZAU RAWH,” (Enlarge the Place of Your Tent, Isaiah 54:2) hmangin Pathien Thu ei ngaituo tlâng dingin ka hung ziek a. Lungril le titakzeta lo tiem seng dingin ka hung fiel chêu. Isai 54:2 hi mi ṭhenkhatin Israel hai Babulon sala an intâng hma kum B.C. 712 laia ziek ni dingin an hril a, mi ṭhenkhat ruok chun Judahai Pathien laka an ringumnaw leia Babulon rama sala ṭhuoia um hai ta dinga ziek ni dingin an ring bawk. Ieng po khawm nisien, zâwlnei Isai hmanga Pathien in, “Puon in hmun zau ding,” thu a hril lai hun hi Judahai ta dinga hun harsat lai, ngirhmun sietak le rinumtaka an um lai le, hun rinum an pal mêk lai a ni ti a chieng a, Isai 54:1.ff. hmu theiin a um. Hieng ang hun harsa le rinuma um an ni leiin, ‘Nuhmei ching nau neilo, beisei le lâwmna ding nei lo,’ le hrilkhi khawmin an um. Hieng ang hun harsat lâitaka iengleia Pathienin puon in zau dinga a ti am? ti hi ei ngaituo ta hlak am? Ei Pathien hi lunginsietna le hmangaina a sip hlak a ni a, a nauhaiin a ditnaw zawng thaw in um hlak inla khawm mi ngâidam hlaktu Pathien, ngâidamna famkim a mi ngâidam hlak Pathien a nih. Chun, Pathien nauhaiin harsatna tuokin, beiseina um ta lo hiel khawp ngirhmunah um hlak inla khawm beiseina thar mi siempekin, mal a mi sâwm nâwk hlak a. Chuleiin, zawlnei Isai kuomah; ‘Aw ching, nau nei lo, hlimin hla sak rawh, nang nauhase ngai naw, hla sak suok phut la, khek suok rawh; pasal neinaw nauhai nêk chun khawsâwtnu nau hai an tam lem sih a,’ ti in a lo hril. Ching, nau nei lo hai angin Pathien mihai in nau tamlem an nei lem ding a nih, ti chu Pathien thutiem a lo nih. Aw, ieng ang thlâwta lâwm um am a na? An suolna hai ngâidam a, beiseina hrim nei ta lo hai beiseina lâwmum siempêk a, lungngâi beidawng hun lai taka beiseina râwl mâwitak a siem pêk thu zawlnei hmangin a lo hril a nih.

Chun Pathienin zâwlnei Isai hmanga- ‘Puon in hmun zau dinga,’ a ti hun lai hin Juda, Israel hai hi tukhawm puon Ina chêng um ta lo an ni a, puon in hmun zau dinga a thupêk hin ieng am inchuktir a nei ning a ta? ti hi ngaituo dinga thil pawimâwtak chu a nih. Puon in hi Israelhai tadinga theinghil theilo pakhat chu a nih. Asanchu, Aigupta ram an suoksan a, ram tiem ram, Kanaan an hung panna lampuia an châm sung khan puon inah an um hlak a. Pathienin Abraham, Isak le Jakob kuoma a thutiem anga- Aigupta rama inthawka a hung ṭhuoisuok khan fâk ding an neinaw hunah ‘Mana’ a pêk a, tui dâwn ding an nei naw hunah lungpuia inthawk dâwn ding tui a pek hlak a, tlai le khawptakin fâk ding le dâwn ding tlasam lovin a pêk pei hlak. Chubak chu ni lovin, an hmaah hmelma ṭi um a um pha leh a kut tha hrâtin a sansuok a, an hmelma hai a hne pêk pei hlak. Chuleiin, Pathienin kut thahratin ram tiem ram Kanaan ram chu a ṭhuoilût tah a nih. Zawlnei Isai kuoma a lo hril angin ‘Puon In’ hi theinghil lova an hriet zing a nuom a. Thlalera kum tamtak sung a kut hrata a ṭhuoina le a ditnaw zawnga an um khawmin zâi a daw pei hlak a. A bân tha hratin Kanaan ram ṭhuoi tlunga an um hi theinghil hlek lo dingin a lo ti a. Chuongang bawkin Kanaan ram an pan laia a lunginsietna an chang zing anga Babulon rama sala an intangnaa inthawkin Lalpa Pathienin a ṭhuoisuokna le, a lunginsietna lei chaua Jerusalem a ṭhuoikir nawk ding le, suon le par tamtak a pek nawk ding thu le, tamtakin mal a sawm nawk ding a ni ti an hriettir nuom lei ni ngei dingin ring a um.

Chun, ‘Puon in’ hmun zauna ding thua hriet ding pawimaw nâwk chu- thupêk hi a nih. An nuom le nuomnaw leia an thaw ding ni lovin, an thaw ngêi ngêi dinga thupêk a nih. A mi Israelhai Aigupta rama inthawka kut tha hrata ṭhuoisuoktu Pathien, thlalêra an um sunga a lunginsietna le an pawimaw tinreng petu Pa Pathien le, Babulon sala an intângnaa inthawka ṭhuoisuoktu le rinum laia beiseina thar siempêktu chun puon in hmun zau dingin thupêk a nih.. Hi thupêk hi Israel, Juda mihai kuomah chaua pêk ni lovin ei ni ringtuhai po po kuoma khawm a pêk a nih. Chuleiin, nang le kei a ta ding khawma thupêk a ni leiin, ieng kawng in am ei puon in zau veng ei ta? ti hi zâwna pawimawtak a nih. Vawisng le ei kâwl le kiengah ei puon in hai zau le suklienna ding tamtak um ngêi a tih. Thil pawitak pakhat chu, tulai ringtu tamtakin Pathien thupêk pawisa lova mani ditdan le ṭha ti dan ang anga hringnun hmang tamtak ei um hi a nih, a pawitak zet.

Kum zabi 16th laia Missionary hmingthang tak William Carrey chun Isai 54:2- “I puon in hmun chu zau rawh,…” ti Bible châng hmanga Pathien kona a lo dawn a. India rama hung lûtin, harsatna le rinum tamtak lo tuok sienkhawm puon in zau dinga kotu Pathien a hmuchieng em leiin, ‘a puon in hmun chu zau in, a hrui hai chu a zêl kir naw a…’’ Chun, tirko hai khawmin thupêk lo petu Krista an hmuchieng em leiin, an inhawitirna ding zawng lovin, Ama hming leiin rinum tinrêng tuor muolsuo in, Krista leia chân ngam, Krista leia tuor ngam le Krista leia thi chena martyr in an lo um a nih. Matt. 28:18 – Thupêk mi petu Isu Krista chu Vân le Hnuoia thuneina po po neitu a nih, ti hmuchiengtu an lo ni leiin mani nuom dan dana hring ding an ni ta nawh, ti hre in, hnam tin laia mi po po hnungzuitua siemtu ding le, a tirtupa thu thua um ding an ni zie hriechiengtu an ni leia harsatna le rinumna hai tuor muolsuotu an lo nih. Chuongang bawkin, Kohran hmasa hai khawma a thupêk le a petu Isu Krista an hriet chieng em leiin, Ama hming le Chanchinṭha leiin sukdudâna, rinumna le hnawchêpna hai an lo tuor a. Krista hming leiin Sakeibaknei pûka thlâk hai dam an lo thlang lem a nih. Kohran hmasahai ang bawkin, tulai ringtu tamtak – Isu Krista hming leia sukrinuma um in, mei a raw hlum le kawlhnâma sat hlum dam an lo thlang lem bawk a nih. Eini ECCI kohran sunga khawm Krista ta dinga sipai huoisen- Krista leia tuor ngam, Krista leia chân ngam le Isu Krista leia thi chen a ringum, Chanchinṭha leia martyr ngam ei um ve dim? Pathien in a naupa Job anga a suong ngam um ei ti’m leh? Pathien ta dinga mi huoisen, ringum ECCI Kohran sungah ieng zam um ei ta?

Pathien thupek hi a tawpna a la’n nawh a, V.4- ṭi naw i muolpho awm si nawh a,’ ti thutiem hi a um sa a nih. Hitaka Pathien thutiem a um ang hin, Matt. 28:20 a khawm ei hmu a nih. “ … Keiin khawvel tâwp chen khawmin Ka umpui pei ding cheu a nih,” ti in. Pathien thupêk chu ei khat chaua thaw suok le ei thaw zo ding a um nawh. Fe a kal pên suok ding, puon in zau ding le suklien dinga tir in ei um a. Hi thupêk anga kal ei pên suok pha pha leh thupêk petu Pathienin a hung thaw pei lem ding a nih. Tirkohai le ringtu hmasa haiin, thupetu hi an lo hriet chieng em leiin a thupêk zawm hi an lo rin ngai naw a nih. Thupêk petu Pathien chau suongin khawvel hmun ram tinah Chanchinṭha hi an lo invâkvâipui hlak a nih. Matt. 14:16 a hin Isu’n ṭhuoihruoi hai kuomah, ‘Nangnîn fâk ding pe ro,’ a lo ti a. ‘Nangnîn fak ding pe ro,’ a ti khan ṭhuoihruoi hai chun, mi hieng zozâi fâk ding chu iengtin am ti’n an lungngâi em em a. Mihriem hieng zât zât fâk ding inchâwkna ding chu an lo lungngâi a nih. Sienkhawm, mi 5000 vâitu chu ṭhuoihruoi hai ni lovin, Ama Isu Krista mâ mâ chun an fâk ding a pêk ta lem a nih. Pathien thil thawhai hmu ding le hrie dinga Pathienin a hmangruo dinga a mi tir ei nih, ti inhrieng ei tiu.

Unau dittak hai, nau nei thei lo ching angin, beiseina le lâwmna hrim nei ta lo khawm ni inla, Pathienin a malsâwmna leia puon in hmun zau le suklien dingin thu a mi pêk a nih. Hi Thupêk hi zâwm phawt phawt inla, Pathienin eini ta dinga an tiemna dungzuiin malsâwmna tamtak a mi pêk ding a nih, ti ring ei tiu. Aw leh, ECCI Kohran mihai po po in kum 2022 sung Pathien thupêk anga, ‘Puon in zau le suklien’ seng dingin ei in fiel a. Chuonganga ei thaw chun Pathienin a thutiem angin, ‘Ching nau nei lo anga um, beiseina hrim neilo hai chu lâwmna hril sêng ruol lo mi pêng a ta. Suon le pâr tamtak a mi pêk ngei ding a nih. Mani puon in zau le suklien thei seng dingin Pathienin ṭhangpuiin mal sâwm raw se cheu!