“Hung Ta U, Lalpa Kuoma Kir Ei Tiu” (Hosea 6:1)

By:- Mrs. Thanghlir, Imphal

Lalpa kuoma kîr hi mitin hin ei ṭûl seng niin an lang a. Khawvêl hin a nghâk sâwt ta leiin, ei hringna- ringna lampui a hin ei kalchâwi hi a rik ta bêk bêk niin an lang a. Hungro Lalpa kuomah kîr ei tiu.

Taksa duâmna le khawvêl thiemna hai hin ei lungril a fâk nasa ta bêk bêk a. Khawvêl inher dân hai hi ei hang en vêlin Krista hungna ding hi a hnâi ta hle-in an lang a. Hlaphuok tu’n “Hun hai an liem pei a, hnuoi lâwmna a bo hlak, khawvela lâwmna a kim thei si nawh;” khawvêl hrî-le-hrai-in a mi chel zing ta bawk, thilmak tamtak ei hriet ta pei bawk. Ṭen panga tla vang vanga um ang ei ni tah. Taksa ta dinga du-âmna lawnga hai ei chuonga, chapona le mani hmasielna lawnga hai ei chuong ta a. Chuleiin, khawvêl suolna tuipui-in ei chuongna lawng hi chîmpil rawi a tih ti inlâu a um.

In khata Nû-le-Pâ hai ei ringna lawng khal hi a hrât ta naw bêk bêk el a. Mani in enfieng ei tiu. I insûng le kohran chanpui hai hmu dingin, nangma a mâichâm kha sukchawk zing la nuom a um ngêi el ie! “Mâichâm chunga mei chu sukhring zing nîng a ta, a thi ding a ni nawh; chun, thiempu chun tûk tinin thing chu tîng a ta, pumrâwhmang thil inhlân chu sie fel a ta, chutakachun, inremna thil inhlân, thâuhai chu a râw ding a nih” Levi Dân 6:12. Nû-le-Pâ hai, ei insûng senga thiempu ei ni an nâwm a nih? Vawisun hin Krista sandamna changtu ei ni ta si a. “Lalpa, mi ṭhangpui rawh, Pathien ngâisak mi an um ta si naw a, Mihriem nâu hai laia hin mi ring-um chu an bo ta si a” Inpakna Hlabu 12:1. Lal David-in a lo ti hi ngâituo tlâng ei tiu. Ringtu hnungtâwl mêk Lalpa kuoma kîr nâwk ei tiu.

Tirko Paula chun, “Thil iengkim thaw ka ta dingin a thienga; nisienlakhawm, thil iengkim thaw a ṭha kher nawh; thil iengkim thaw ka ta dingin a thienga; nisienlakhawm, ieng thu hnuoi a khawm kân phal nawh” I Kor. 6:12. Ringtu hai po po hi ei rênga ei inlâwi khâwmna ding vân Jerusalem a khin ei insûng, ei nâu-le-te hai leh ei inlâwilût tlâng thei dîm? ti hi ngâituo a ṭûl takin an lang. Ei nâu hai hi nguntaka enkawl an ṭûl takzet an tah. “Ka nâu hung rawh, hringna bei pêng ka che; ka nau hung rawh, hringna tui pêng ka che” tiin ei Lalpa Isu Krista chun a mi ko mawl mawl el a nih. An leh; nang le kei, ei nâu hai hi hringna bei le hringna tui hai hin ei châwm am? In ngâituo tlâng ei tiu. Rupture ni hai hung tlung a ta, Nû-le-Pâ haiin nâu zawng an ta; nâupang haiin Nû zawng an ta, inṭhena rapthlak um tâng a tih. A va pawi ngei, ei piengthar naw chun; thlân le thina-in a nghâk che. Chatuon hringna i chang naw chun insîr i ti; chatuon chenin.

Unau, “Lalpa kona râwl mâwitak chu pan la, Lalnunnêm chun tuhin a ko che. Lalpa kona râwl mâwitak chu pan la. Hmangai râwlin hung pan raw a tih.” Khawvêl hi ei inzinna le ei mikhuolna ram a ni a. Natna, hrî-le-hrai mi sukrin-umtu tamtak ei tuok ding rêng a nih. Harsatna, rin-umna, beidawngna le natna hai ei tuok châng khawmin Isu Krista hnai ei tiu. Ama’n a mi sukdam nâwk hlak a nih. Hung ro thlarau suol ihne hai, Lalpa’n chawlna a nei, Ama’n inchawl damtir a ti cheu. Ama thu ei ring phawt chun, Pathien tienga ei hrât nâwna le ei tlâksamna hai chu – Kana khuoa inneina uoiin bêl ruok, Lalpa hmaa an dâw ang khan. Ei tlâksamna po po hi Lalpa hmaa dâw vêng ei tiu, an naw chun, Lalpa’n sung phâk naw nih.

Aw leh, lungril a inlang thiem lo taka zieksuok a um; lo tiemtu hai po po Pathien malsâwmna chang seng dingin ka ditsakna kan hlân.