HSP KŢP Annual Sport huoihawt; Head Office Staff le Organising Committee friendly match inkhel

Tuiṭhaphai, November 18, 2020: November 17-18, 2020 sung khan Hmarsak Pastorate KŢP chun Thanpari Sailo Memorial Futsal Arena, Kawnpui-ah Annual Sport, 2020 hlawtling takin an huoihawt. Annual Sport hi kum tin KŢP Inkantuo Intuokkhawm le hmang kawp hlak a ni a, tukum hin Covid-19 hrileng leiin a hun taka hmang thei ninaw sien khawm, khawvel boruok le inmil peiin a zangkhai thei ang taka huoihawt a nih.

Annual Sport, 2020 a hin HSP bielsung unit hran hrana inthawk nuhmei le pasalhaiin tulaia football khawvela hrietlar le inkhel hlaw tak, player 6 pei um theina ‘Futsal’ an inkhel a, buoina iengkhawm um loa Sport hi hmang zo a nih. Group le Individual prize dawnghai chu a hnuoia ang hin an nih:

Pasal (Football)

1^st – Muolvaiphei

2^nd – Lamka

Nuhmei Football

1^st – Rengkai

2^nd – Lamka

Individual Prizes:

Top Scorer (Pasal): Nehemiah Buongpui, Rengkai & Lalmalsawm, Muolvaiphei

Top Scorer (Nuhmei): Grace Hmangaizo, Rengkai

Best Keeper (Pasal): Obed Lalhrietfel, Muolvaiphei

Best Keeper (Nuhmei): Rebek Malsawmkim, Rengkai

Note: Lawmman dawnghai hin Medal le Cash Prize an dawng seng a nih.

2020 HSP KŢP Sport a hin kum danga la um ngai lo, EAC Pastors le Head Office Staff hai ṭhangruol le Sport Organising Committee hai Football inkhel a ni a. November 17, 2020 khan Sport Organising Committee han hratna an chang a, November 18, 2020 ruok chun Sport Organising Committee hai Goal 3 in an tlawm thung. Anni hi KŢP Sport boruok suklumtu pakhat an ni ve a, final inkhel khawm an la tum nia hriet a nih.

HSP KŢP Annual Sport, 2020 hi HSP PO Rev. Roparlien Ralsun in hawngin football kick-off hun a hmang a. Sport Closing Ceremong hmangna-ah Pasal Team 1^st le 2^nd hai Rev. Lalkhamlien, Executive Director le Rev. Laldinglien, Mission Director haiin Lawmman inhlanin Medal inawrtirna hun an hmang a; Rev. Lalngaizuol, Finance Director le Pu Simon L. Hrangchal, Director, Relief & Development ha’n Nuhmei Team 1^st le 2^nd Prize dawnghai Lawmman le Medal inhlanna an nei khelah, Rev. Zawllienmawi, EAL; Rev. Roparlien Ralsun, HSP PO le Pu Lalbuotsai Sanata, YCO ha’n Individual prize lawmman dawnghai medal le lawmman an dawnghai inhlanna an nei a, Upa Lalthangvung, HSP Standing Committee Chairman in Sport kharna a nei zoin thlakhla tak pumin HSP KŢP Sport, 2020 chu ṭumṭiek a nih.