Hlim-En Silver Jubilee hmang; Silver Jubilee Souvenir tlȃngzar

Tuiṭhaphai, January 23, 2021: Vawisun chawhnung dar 1:00 PM khan Rengkai EAC Biekin Campus-ah Hlim-En Silver Jubilee hlawtling taka hmang a nih. Rengkai EAC KTP organ Hlim-En Weekly hi kum 1995 a ṭan niin nikum kha kum 25 a tlingna a ni tah a. Nikum sung khan Covid-19 hrileng leiin nundan pangngai ei hmang thei naw leia kumthar huna Jubilee lawmna hi hmang chau a nih.

Silver Jubilee lawmna a hin Pu Joseph L Sungte, Asst. Registrar, IGNTU Khuollien in a ṭhang a, Khuol Inzaum le Khuol Chawngpu in Tv. Beiruolthang, Asst. Audit Officer, AG le Pu Lalrindik, Chairman Rengkai EAC KŢP hai an ṭhang a, EAC hlasakthiem Nk. Enchimlo le Nk. Deborah Lalnunthieng ha’n mipui fekhawmhai Rimawi-in an in-ȃwi bawk.

Hun hmasa tieng Khuollien Pu Joseph L Sungte in Hlim-En Silver Jubilee Souvenir tlangzarna a nei a, Souvenir hi Rev. Lalkhamlien, Executive Director, EAC in Pathien kuoma inhlanna a nei a. Programme a hin Khuol Inzaum, Khuol Chawngpu, Rev. Lalkhamlien, HSP PO Rev. Roparlien Ralsun, Rengkai EAC Local Chairman Upa CH Paua, Hlim-En Silver Jubilee Celebration Committee Chairman Upa Lalṭanlien Joute le Rengkai khawsunga Kohran tum tuma Weekly News Editors ha’n thuhril tawi hun an hmang.

Souvenir tlȃngzar zo hin Chief Editor Pu Ramditum Ralsun in Souvenir briefing hun a hmang a. Hlim-En Silver Jubilee Souvenir hi khawvel boruok buoi leia Jubilee lawm thei lo a ni pal khawma kum  25 meu a tlungna le inzawma lungphun pawimaw tak a ni ding leia sukpuitling ngei tuma hmalak a ni thu, Souvenir a hin section 6 hieng Editorial, Greetings, Article Section, mi thenkhatin an sung-le-kuo le lȃina hai hrietzingnaa an insuo Obituary Section, Advertisement Section le Photo Section hai hlûlut an ni thu le, Article section a articles 15 hai lai hriselna huong le ni tina ringtu khawsakna a hang zawm el thei Pathienthu le Pathien thu le inmila kalchawina ding Social Gospel hai bakah, Rengkai EAC um hlima inthawka Souvenir vawikhatna a ni leiin, hieng Rengkai EAC indin ṭan lai le Kohran fe pei dan le Department tum tumhai chanchin hlûlut hai hi Rengkai EAC ta dinga lungphun pawimaw tak an ni ding leiin, Rengkai EAC member ni kher lo khawm, chanchin chik mihai ta ding chun ngaitha chi an ni naw ding thu Chief Editor chun a hril.

Hlim-En Silver Jubilee lawmna inkhawm hi Tv. Simeon Zote le Nk. Lalremruot Ţhiek ha’n an keihruoi a, hun hawng ṭawngṭai Upa D. Kamzamuan in a nei a, Jubilee lawmna a ṭhanghai Celebration Committee Secretary Tv. Hrangneilien Joute in lawmlutna hun hmangin, Hlim-En Editorial Board Chairman Tv. Joseph Lalzuithang in lawmthu hrilna le khuol ṭha le Hlim-En bul lo ṭantuhai chawimawina inhlanna hun a hmang a, Mission Director Rev. Laldinglien in hun khar ṭawngṭaina a nei zoin Jubilee lawmna a ṭhang ha’n ruoi inhniktak an kîl tlang.