FATHERS’ DAY THUCHA

By:- Zochalsung Joute

Kei, nau enkawl le thunun zo ta lo pa thu insuo ding chi niin kan hriet nawh a, amiruokchu, nu le pa nau enkawltu ding tamtak la umhai ta dinga thucha hi tlin naw le inphalam takin ka hung ziek a nih.

Nau enkawl hi sin po pohai laiah chu thilthaw harsatak le thiem harsatak niin an lang. Hi sin hi nu le pa taphawthai mawphurna lieu lieu a nih. Chuleiin, naupang an hung seilien phaa an nina ding chu an chînlai le dâwnglaia ei enkawl ṭhat le ṭhat naw dan i zirin an hung khawsa ding an leiin an lungril le ngaituona hrât hun sung kum 1-4 inkâr hin theipatawpa thil inchûktir hi mâkmaw le ṭûl a nih. Sâp thuvarin “A bul ṭan indik chu a zâtve zo tluk a nih” a tih. Naute dâwng anni laia sawizawia enkawl ṭhat naw chun, lungril ngarin an khawsa zo el thei a nih a, thunun hne lovin an khawsa sawng ding a nih. Chu pha chu siemṭhat ruol anni ta naw ding a nih.

Ei Bible in nau enkawl dan ding le thunun dan ding a hrilhai chu:-

1. Beiseina a la umlaiin I naupa chu thunun rawh, chuong naw chun a thi/ a bohmang I remti tina a nih. (Thuv. 19:18)
2. Naupang chu a hraw ding lampui inchûktir la, a hung upat hnung khawma chutaka inthawk chu pêthmang ngai naw nih. (Thuv. 22:6)
3. A hmawl hmang nawtu / hla tu chun a naupa a theidaa, nau hmangaitu ruok chun a thunun hlak. (Thuv. 13:14)
4. Hmawl le kâwk/zilna hin varna a pek hlak, thunun lo nau chun a nu a sukmuolpho/sukzak hlak. (Thuv. 29:15)
5. I naupa thunun rawh, sawldam/hadamna peng a ti che. (Thuv. 29:17)
6. Naupang thunun a intîm naw rawh, hmawl a I vuok lei chun thi naw nih; hmawl hmangin hrem la, seol/hremhmuna inthawkin a thlarau sansuok I tih. (Thuv. 23:13,14)
7. Nangni pahai, in nauhai suklungsen naw unla, Lalpa thu zâwm dinga thununin inchûktir lem ro. (Efesi 6:4)
8. Naute anni laia inthawkin an hma thei anga enkawl ṭan nghal ding a nih. Sikul hmasatak chu insung a nih a, zirtirtu hmastak chu nu a nih an lo ti hlak.
9. Nau thunun ti lei seka vuok le sâwi tina an nawh. Hmangai puma siemṭhatna dinga zil, kâwk le infuia thunun a nih. Chun, an suksuola ei hrem ding a ni chun a hmain ei hremna ding san feltakin ei hril pek hmasa ding a nih. Hril lawk lova hrem thut chu a ṭha ngai nawh. Chun hrem ding ei ti ta chun hrem ngei ngei bawk ding a nih. Thunun ding chun lungsen hla dei phawta thaw chau hlak ding a nih.