EN-HAKKORE

By: Ramditum Ralsun

“A kind gesture can reach a wound that only compassion can heal”  Steve Maraboli

‘En-Hakkore’ ti hi a ṭawng bultieng deu, sapṭawng chun “Fountain of him that call or prayed” tia inlet a ni a. A umzie tak ni dinga inlang chu, a kotu annawleh a mamâwtu ta dinga tuihnâr ni awm a ni a; chu nêka inril le inthûk lem meta hril ding chun, tuihnâr kha a mamâwtu pawimâw tak pea a harsatna phuhrûktu a ni leiin, ‘En-Hakkore’ ti hi harsatna chi hran hran tuok mêk, ṭhangpuitu ngaia inrûm mêk dam le, ngirhmun inṭum lo lei dama lungrila inrûm mekhai an mamâw pea an harsatna phuhrûkpeku ti khawma inlet inla suol kher naw nih. Tuihnâr kha a pawimawtak, Samson a chau sie laia a ngirhmun ngâia inumtir nâwktu a ni a, hi tuihnâr hi a nih ‘En-Hakkore’ tia a hming an inbûk tak chu! ‘En-Hakkore’ hin ṭhangpui ngaihai ṭhangpui le sawmdâwltu, mihai ta dinga damna intluntu le midangin nun pangngai an nei theina dinga sinthâwtu khawm a kâwk thei a, Isu tlanna zara nunthar nei, ringtu intihai khawm hi ‘En-Hakkore’ ei lo ni thei zing âwm ie!

Luka bung 10-naa khan Isu’n Samari Miṭha chanchin, tekhinthu a hril a. Jeriko le Jerusalem inkara suomhmang tuok, a silfenhai hlîp pêka an vuok hrep, thi vâng vânga an imâksan ṭhangpui a, a hliemna tuom peka, an enkawlna ding man pe a, a ṭul ang pei pêk belsa inhuoma ngaiventu kha Samari mi, kha’ng lâi huna chu hnam hnuoihnunga a’n ngâi, Israelhai lem chun a’n hlîmin a hlie ringawt khawma inthiengnawna ah an ngai hiel hlak nia hril an nih. Hnam chunghnunga inngai, Levi le rawngbawltu Thiempuhai khan chu suomhmang tuokpa kha lampui sîr khat tieng a’n hêl dai el. Thilmak tak a nih! Midang ṭhangpui le sawmdâwl hi mi chetheihai thâw ding bîk deua ngaina dam, harsa le riengvaihai ṭawngṭaipui a, an mamaw ang phuhrûk dinga Pastor le Upa, rawngbawltuhai chan ding anga ngaina dam hi thil indik lo tak a nih. Midang ṭhangpui le sawmdâwl ding hin ei ngirhmun le nina in thu a phur naw a, mitinin ditthlang theina ei nei seng lem a lo ni âwm. ‘En-Hakkore’’ ei ni ve am leh!

Ei chêngna khawvel a hung changkâng le inzûl peiin, abikin Churachandpur a ngei khawm hin suolna in hma a sâwn hrât hle a. Kum 5 vel liemtah chau khan hieng inruithei chînghai hin khawhnâwm panin an inkâp hlak a; tu ruok hin chu bazar hmun le mi lûnna haia khawm an inkâp ṭhuoi ṭhuoi tah a, ieng a’n ngaikhâwk bêk bêk tanaw khawm a hawi el khelah, suol thawah khawm an inngâi tanaw ti thei hiel an tah. A pawi thei ngawt el! Hieng inruithei chînghai dam hi eini ringtuhai ang bawka suola insieng ve, ṭhenkhat chu sandamna khawm chang tah nun hne lo dam an ni tâwl laiin, mi ṭhenkhat chu Bible in hun nuhnung tienga thil tlung ding a hrillâwk, ṭhat nuom lo hrim hrimhai ang pawl khawm um tho mei an tih. A tlangpuiin hienghai ang pâwl hin lungril natna, ‘depression’ ei tihai ang hi an nei tlangpui hlak an tih. Chanchin pakhat ka lungril them em emtu chu: 2009 kuma project work kan thaw, nawchizawr ei ti el hlak, Commercial Sex Worker (CSW) hi Churachandpur-ah kha’ng lai hun nêk khan a lêt 3 vêlin an pung tah ti hieng tienga sinthâw hlak ruol ṭhenkhatin an mi hril kha a nih. Hieng ang mihai hi an ditthlangna hmang suol leia suolin a man sawng khawm an um laiin, mi ṭhenkhat chu an ngirhmun zirnaw leia cham lova intâtlût khawm an um ve tho a. Nun beidawng le santu ngâia inrûm el tah dam tamtak an um a; nun pangngai neia hadam taka a’n khawsa theina dingin ‘En-Hakkore’ an va pawimaw deh! Ṭhalai Pâwl le Kohranpui dam hi ‘En-Hakkore’ ei ni ve am leh!

Ei thuring Bible chun mihai damna ni dingin a mi’n chuktir a. Kolossa 4:6-na chun, “in ṭawngbau suok chu chia sâw, lunginsietna ṭhang ni rawp raw se.” ti’n a lo hril a. Bible a hin chi hmun tam takah hmang a ni a, hmun ṭhenkhata umzie nei, thlarau tienga kâwk nei dama hmang a ni hlak a, chuong huna chun chi hin ringumna, lunginsietna, thienghlimna le mi ṭangkai nina dam inkâwktir an ni hlak. Chu nun tak chu neia, ṭawngbau suok ṭha tak, mihai damna ni dingin Tirko Paula chun Kolossahai a’n chûktir a nih. Einihai hi teh mihai damna eini ve hlak am? Ṭawngbau suok el chau ni lo, khawsak le nundan rênga khawm mihai damna nia an mamâwhai phuhrûk pektu, nun pangngai inneitira hadam taka midang siemtu tamtak, Bible thu le minaran chanchin khawm hril ding tamtak a la um a, ei hril seng naw ding leiin ngaituo zawm seng ei tiu. Tiemtu dittak, ‘En-Hakkore’ I ni ve am leh!