EAC Muolhlum Biekin hawng

Tuiṭhaphai, November 27, 2022: Hun iemani chen liemtah a bawl, EAC Muolhlum Biekin chu vawisun chawhma dar 11:00 AM khan ropui taka hawng a nih. Biekin hawngna programme hi Pastor Dr. Lalbiekthang Buhril-in a keihruoi a; Rev. Roparlien Ralsun, Pastorate Officer-in Biekin hawngna a nei zoin mipui Biekin sungah lutin Upa Lalthangvung, Standing Chairman-in Biekin inhlânna a nei. Biekin hawngna le inkhâwm programme-ah Rengkai KṬP ha’n inpâkna hlapawl thiem takin an inhlân a; Upa Lalṭhalien, HSP Presbytery Chairman in EAC Muolhlum unit puongzârna neiin Rev. Lalkhamlien, Executive Director-in EAC Muolhlum unit-a Interim sunga ṭhuoitu dinga ruothai ṭawngṭaipêkna a nei a, Upa Lalṭanlien Joute, Standing Secretary; Upa CH Paua, Chairman, Rengkai EAC; Pu Lalroding, Finance Secretary, Building Committee, Rengkai EAC haia inthawk EAC Muolhlum Biekin bâwlna le inzawma report le thuhril tâwi ngaithlâk an nih.

EAC Muolhlum Biekin hi May, 2020 a inthawka bawl ṭan niin, kum hni sung chaua hluo thei dinga bawl zo hmana a um hi lâwm a um hle a. Biekin hi zofel dawk la ninaw sienkhawm, Biekin thara inkhâwm le mi ṭhahnemngaihai zarin hmabâk hai hun sawtnawte sunga sukfel thei beisei a nih. EAC Muolhlum Biekin hi hmalakna ṭan a nia inthawka hawng chenin, a hmun man le Biekin bâwlnaa seng po chu ₹.48,76,375/- (Rupees Fourty Eight Lakh Seventy Six Thousand Three Hundred & Seventy Five) only a nih.

EAC Muolhlum Biekin a hin zâna khawm a nuom taphawt inkhâwm thei dingin programme siem nawk a ni a. Inkhâwm Upa Lalṭhalien-in a’n râwi a; Nk. Enchimlo Lalrammawi a inthawk inpâkna hla ngaithlâk niin, Rev. Lalngaizuol, Finance Director-in Pathienthua rawngbawlna a nei.