EAC Chanchin

EAC kohran hi Manipur Siemtieng biela kohran hmasatak, a ziding kohran le pawl dang a petna nei lo la fetluong pei chu a nih. Biekin hmasataka inkhawm kohran chu tuchen hin Senvawnah EAC Unit puitlingtak a la ni zing bawk. EAC hi Evangelical Congregational Church of India (ECCI), inhma North East India General Mission (NEIGM) ti lo ni hlak hnuoia Presbytery hai laia pakhat a ni a. Mr. Watkin R. Roberts-in Chanchin Țha hrilna ding hmun enkaia Aizawla inthawk Senvawn, Manipur a hung sirna rasuok a nih. Mr. Watkin R. Roberts in Manipur Senvawn a hung sir țum chun a ram mihai chu Chanchin Țha hrilna dingin an inhawng zie a hmu a. Aizawl tienga a kir nawk hnung chun Mizoram Aizawla Missionary lo um Dr. Peter Fresar le inrawnin a ram mi, Mr. Thangchhingpuia, Mr. Vanzika le Mr. Savawma hai chu Senvawn a uma Chanchin Țha hril dingin an tir ta a. Anni pathum hin May 7, 1910 in Senvawn, Manipur an tlung a, rawngbawlna an țana inthawk sawtnawtea chun ringthar an hung um a. Dodaltu um hai sien khawm Pathien Thlarau in huoisennain an thuom leiin Chanchin Țha hril chu chawl lovin ringthar an hung pung ta deu deuva sawtnawte a kohran a hung piengsuok ta a nih.

Kohran hung piengsuok hi a hmasatakin “Thado-Kuki Pioner Mission,” ti a ni a. Kum 1924 a Inkhawmpui an nei hun a chun hi hming hi thlengin “North East India General Mission,” ti chu hi kohran hming dinga phuokthar le suknghet a hung ni ta a. Lakhipur, Assam ah Headquarter hmasatak indin a ni a, chu hnung 1930 chun Churachandpurah sawn a nih. Tuchen hin Churachandpurah a lan nghat zing a nih.

Chanchin Țha hril rawngbawlna chu an dar lien peia, ringthar an hung pung deu deu a. Kohran hung ințhanglien chun hnam hran hran, țawng hran hran an hung um ta a. Kum 1952 chun țawng hmang izirin NEIGM chu Presbytery hrang hranin a hung ințhedar a, rorelna ruokchu NEIGM hnuoia la um vawng an nih. Hmar țawng hmang hai po chun NEIGM Inkhawmpuilien “Assembly” hming sawmin “Assembly Church,” ti chu an Presbytery hming dingin an phuok a. Kum 1970 khan Assembly Church chu Evangelical inchuktirna pawmtu a ni zie suklangna dingin a hming bula Evangelical belsa in “Evangelical Assembly Church,” ti a hung ni taa, tuchen hin chu hming chu a la put zing a nih.  

EAC hin Presbyterian ințhuoi dan zuiin, Evangelical Thuring an chuktir a. Kohran Thuring (Evangelical Doctrine) le inremin Dan (Constitution) fumfetak neia in enkawl a nih.

Kumkhat peiah Inkhawmpuilien General Assembly neiin, chu Inkhawmpuilien chu kohrana rorelna insangtak a ni a, rorelna chu Moderator-in a keițhuoia, thurel hai ziektu dingin Secretary pahni thlang hlak a nih. Inkhawmpuilien karalak a țul ang peia rorelna Council inkhawm kumkhata vawihni pei nei hlak a nih. Head Office chu Executive Directorin an rawi a, Department phurtu Director hai le inrawn peiin Office hi enkawl a nih. Director hai hi kumli sung peia dingin Inkhawmpuiliena thlang hlak a nih. Executive Director hi Kohrana pumpuia mawphurna cheltu a nih.

EAC kohran hin biel pali, Pastorate ti’n ințhedar a ni a. Pastorate biel tin hai chun Pastorate Officer pakhat peiin a enkawl a. Mission Field pali bawk neiin chuong Mission Field hai chu Field Superintendent pakhat sengin an enkawl bawk. Hieng Pastorate Office hai le Mission Field Superintendent hai hi kumli sunga dingin Inkhawmpui liena ruot an ni hlak.

Tulaia EAC Headquarter Țhuoitu hai:

1. Executive Director : Rev. Lalkhamlien
2. Director Finance : Rev. Lalngaizuol
3. Director Missions & Evangelism : Rev. Laldinglien
4. Director Relief & Development : Mr. Simon L. Hrangchal
5. Evangelist-at-Large : Rev. Zawllienmawi
6. Associate Evangelist-at-Large : Rev. Zakapțhuom

EAC hnuoia department hai:

1. Department of Finance
2. Department of Relief & Development
3. Department of Missions & Evangelism
4. Music Department
5. Youth Department
6. Women Department