Damlaini Tiem Dan Thiem (Sam 90:12)

By: Lalthanglien, Saidan

(Thuhriltu Vol. XLVIII/No.11/November/2020)

Vawisun Pathienni, ni thienghlimtak hunthar ni lawmum tak Lalpa’n a min chuong kai tir a. Hunthar mi petu, ei Pathien hming chu inpakin um sien la. Kohran hai in mani insunga mani umna hmun senga Pathien Thutak lo ngaithlaa, chuonga hun lo hmang dingin vawituk hin ei hang infiel tak zet a nih.

Tiem lai po po a tiem intak tak chu damsung ni tiem hi a nih. Naupang chu School a va kaia zirtirtu hai in hawrawp tiem dan, ziek dan le hmang dan an hung inchuktira an hung thiem el hlak a na. Kristien hringnun ruok hi chu hmu thei lova ințan a ni leiin hmu theilo thlarau thienghlim pawlna  Kohran hai in ei dawng zing naw chun changsuol a awla țawngsuol a awla damlaini tiem buoi a awl hlak a nih.

Chuleiin, Sam ziektu chun kan damsung ni hai tiemdan kan thiem a ti hmasa naw a. “Min chuktir rawh” ti hi Pathien kuoma a ngena, vawituk hin kohran hai in vawisuna ei hun hmang mek le ei hun tlung mek hi iengtinam tiem thiem thei ei ta. Lalpa le hin iengtinam intuok nawk thei ei ta, ti hi lungrila ei ngaituo thar hi a pawimaw ka ti bek bek el a. Chuleichun, Lalpa inchuktirna a \hangnaw pha pha chun Lalpa țhang lova inthiem amani inchuk hriet thiem dam a nei pha chun mi’n uongna annawleh thawthei intina dam a nei hlak. Lalpa inchuktirnaa inthawk annawleh Pathiena inthawka inchuk dawk a ni pha pha chun uongna ding a um ve naw a, Lalpaa inthawk a ni ti ringtu’n a  hriet dawk hlak leiin.

Damlaini tiem thiem ding chun vawisuna kohran hai hi Lalpa min chuktir ei tul a ni ti hi ei hriet hmasak ka hang nuom a nih.

Ei Bible a khan Genesis 29 na a chun Jacob nuhmei hlaw thu ei hmu a. Chu taka ei hang lak nuom chu Jacob in a dit em em le țha a ti em em chu Rakil a na. Rakil hlaw dingin kum 7 a pu rawng a bawla, nisienlakhawm a pu Laban chun kum 7 a tling tlak zan tak chun a nuhmei ding a va pek a, (khang lai huna nuhmei hai reng reng chu puon lu inkhum an hmel khawm nuom nuoma hmu thei khawm an ni nawh) chulaichun a nuhmei ding a va pek ta a. Zingkar khuo a hung var chun hmel țha em em Rakil ni dinga a ring chu Leah a lo ni ta zing , chuleichun, Jacob chu a lung a sen ta em em el a nih.

Damlaini a tiem buoi ta a, a pu Laban a suosal a, Rakil hlaw dingin kum 7 i rawng ka bawl a, iengdinga Leah a hmel țhanaw lem  imi pek am a na, a ta, a dit lem a hmu zing sia a ditnaw lem pekin a um si a. Pathien tum dan le mihriem dit dan an ang vawng naw a, iemani chang chu ei dit zawng hung tlung hmasa lovin ei dit naw lem ei nunah a hung intlung tir a. Ei dit naw lem ei tuok pha pha leh ei hring nun ei tiem thiem theina dingin “damlaini tiem dan min chuktir rawh, Varna lungril kan nei pha hiel theina dingin” ti a țul hlak. Lalpa a inthawk varna naw chun hi damlai hringnun hi tiem thiem thei an nawh.

Amiruokchu, Jacob kha hang en nawk inla. A ta dinga țha lem dinga a ingai Rakil nek khan țha lo lem dinga a ngai tak Leah kha a insung tung dingtu dinga Lalpa remruot a lo ni tlat el. Vawisun hin ei nuom dan ang khawmin kohran a um thei ta naw a, ei dit dana ei um thei tak nawna san hin Lalpa’n iemani min chuk dawk tir a tum ning a tih ti hi vawisun hin kohran hai in inhrie thar inla ka nuom bek bek a nih.

Israel hai kha Lalpa’n a thuoi a Lalpa’n a thuoina lampuiah a țha le an du zawng ruok Lalpa’n pek a lo tum naw a, an ditnaw zawng vawi tam tak el a pek a, An hel lei dam, thu awinaw lei dam in, Pathien in a hmangai naw lei ni thak lovin a hmangaina an hriet chieng thei zuolna dingin iemani chang chu hnam dang hai kuta sala dam intang dingin a tir liem nawk hlak a nih. Kanaan ram hluo ding le Jerusalem khawpui hluotu ding hai chu Babulon vadung pang phahram bula dam an ,ingțang hai an zu bang a, phahram bula inthawka hung kir nawk dingin Lalpa’n lampui a siem pek a ni kha. Vawisun hin eini khawm ei nuom dan le ei dit dan haia Lalpa’n mi țhuoi naw ni a, harsatna hmuna dam ei dit zawng nilo ei nuom zawng ni lo ram a chun  Lalpa’n mi țhuoi hlak a ta. Chu hmun a inthawka Lalpa hmangaina hrethiem dingin ei damlai ni hai tiem thiem dingin ei ditlo rama hin Lalpa’n a mi hnaw lut tak meuin ka hriet.

Genesis 16 Hagar kha hang en nawk tum leh. Ama tienga a neisun chu tuium pakhat chau a nih, chu tuium chu ringsan in a naupa Ismael leh Bersheba thlalerah beidawng takin an um a. A tuium a hung ruok, a naupa Ismael hlak chu thi el ding dangchara khekin a țap a, nau dangchar en ngam lovin hmangaitu nu chu thala kap phak chena a fe a. Chutaka chun chimbuk pakhat a chun a țhung chawt a. A nau thi ding a en ngam naw leiin chu hmuna chun a um ta a.

Lalpa Vantirko a hung țawng a, Hagar tho la naupang kha i kutin chelin kei tho rawh, ama chu Lalpa’n chi ropui takah a siem ding a nih. A umna hmuna a țap rawl kha Lalpa’n a hriet a nih, mi beidawng țap rawl chu Lalpa’n a hriet a nih. Hun nuhnunga hung tlunga hunkhir ei tawng mek lai hin kohrana mi iengza rawlri am Van tieng inri dawk a tih aw, annawleh Van tieng rawl hi mi iengzat in am hrieng ei ti aw! ti hi ngaituo khawp tling in ka hriet. Chuongchun, thlaler ram țawla tuisunsuo tui inhnik tak Hagar in a hmu theina ding chun thlaler chimbuk hnuoiah suk beidawng a lo țul a nih.

Upa hai in mihriem siemțhatna ding chun khawdur a ngai hlak an lo ti a. Vawisun hin malsawmna, anhnik le a țha vawng, a pangdamna ram vawnga Lalpa’n mi țhuoi ding nisien ei nun a puitling thei naw ding a ni leiin ditlo ram a hin Lalpa’n damlaini tiem dan min chuktir a nuom a, ei tiem thiem  ta lo rama damlai ni hi tiemdan min chuktir a tum a nih. Ei varna a ei inchuk thiem thei  talo ram a ni leiin ei hringnun a hin Surrender nun a tam po leh Pathien thilthaw theina ei hmu rawn el ding a nih.

Țawngți mi George Muller anti pa chu mi’n an hang bel chieng a. Pathien hmaah a țawngțai chang hin a dingțhațhuon hlaka, a khup chu lawi khup ang elin, lawi khup anga sa teltul invung lellul a vun a piengpui vun reng khawm nita lova hmelhem a lo ni a. Chu chu lang thei rama ding chun a mawi naw hle a, nisienlakhawm chu hmelhemna rama chun Lalpa a kuoma chu an puong tlat a nih. Pathien hming chu inpakin um raw seh.

Anhawi zawng vawnga Pathien biek ei tum  ana, enta um ei kohran hi nikhat lai khan ruol țhenkhat khat ka zuk pawl a, an Whatsapp Group hai dam ka hang en a Sermon tiem ding hi an tlar nghen nghuona Pathien Thutaka kohran hai chawm tumin an intlar suok a. Ei kohran Whatsapp Group hai hang en ta u, rawngbawltu khawm ei tam Ordination chang hriek nal khawm ei tam, inkhawm theilo Biekin ei rausan ta hnunga mi beidawng khek suoka Lalpa tienga inthawka malsawmna dawng thar, damlaini tiem thiem dinga Lalpa’n an chuktir hai a inthawka thuthar hung tlung tiem ding khawm ei nei le!

Chuong khawp chun mani nuom zawng inhawk zawng rama hin ei tlan nasa taluo ta a. Covid-19 hin a mi sukbuoi der nawh ka ti ngam a nih. Beidawng tak tak ni inla chu mi beidawng tak tak to țawk țawk hi an um ngai naw reng reng. Lalpa hmabula khek suok hai hi an umna hmun thlaler ram țawla khawm tuisunsuo Lalpa’n an hmu tir a, damlai nun a khawsak dan ding Lalpa’n a rel dawk pek hlak a nih.

Chuleiin, in Surrender nun a tam po an leh hringnunah Lalpa thilthawtheina puongsuok in a um rawn el a nih. India mi țawngțai mi Bak Singh an ti pa kha ropui tak el, a thi hnung chen khawma a Station kha an siem a, a en ding mi sang tel vawisun ni chen hin an lan tlar bit el a nih, vawikhat chu Hyderabada inthawkin Bengalore a vuong ding a na. Airport a chun mi pakhat a vuong suok tawm țep in a kuoma a va fe a, Pu, I mi țawngțaipek ka nuom a nih ka beiseina che a sawt an ta a ti a. A țawngțai pek tupa a hang en chu aw, Pathien hmu in a hmu ta tlat el.

Vuong insang dan : Vuongna a lut hmasa lovin a țawngțai el ta a. A țawngțai a hang inhnik a, a țawngțai sawt deu leiin vuong na’n a vuong san ta a. A hang Amen chu vuongna chu van boruokah a um der ta a. A țawng,ai pa chun Pu a va pawi de aw. Iengtin am ei thaw ta ding a na a ta, Bak Singh chun, Lalpa ka kuomah a um a ka thla a muong a nih a ti pek a. Vuongna’n a vuong san hnung khawma Lalpa a kuoma a um leiin a thla a muong a nih. Thlamuongna chun a vuong pui thei khawm nilo a thla a muong a nih, a nun a tlan buoi naw hrim hrim a. Lalpa’n damlaini an tiem thiem tir ta hai, an chuktir ta hai nun hi chu dit a va um em em de aw! Kha vuongna a khan ei la chuong ding a nih, ka thla a muong a nih. Lalpa ka kuoma a um a ni a ti tlat.

Airport a chun thu an hung puong ta a leh, tuta vuongna hung vuong dawk chara khan lal ropui Belgium lalnu a chuonga, a kutsebi a tlung In Hotelah a theinghil a, chuleichun a hung kir nawk ding a nih, tiin. Belgium lalnu chun mi kirpui ro ka kutsebi Hotelah ka theinghila seng po po kei in tum vawng ka ti, a ti leiin vuongna chu a hung kir nawk ding a nih ti thu an hung puong ta a. Vuongna’n a vuong san hnunga mi beidawnglo Bak Singh,  dam laini tiem buoi lo hrim hrim pa kha mak takin a chuongna dingah Lalpa’n lal ropui a lo inchuong tira vuong sana um hnung khan a hung kir nawk a thlarau ram a ansang po le tiem suol a um naw el a nih.

Ei dit naw dan a, harsatna beidawng na’n a mi tuom vel lai ku hin ei mizie indik tak a suok hlak a nih. Chuleiin, Hyderabad a inthawka Bangalore chu himtakin Bak Singh chu a vuong tlung ta a nih. Chuleiin, Kristien hai hi aw vawisun hin hieng zawng hin Thlaraua khawm ei vuong inhnuoi pha pha leh ți ding ei hmu rawn a, ei buoipui khawm a chin hlak. Vuongna khawm hi a hang vuong insang tak tak chun Seat Belt inkhit khawm a ngai le, ei vuong inhnuoi pha pha chun ți ding a tam taluoa Seat Belt inkhit lovin vuongna sunga hin ei buoi ngat ngat el a nih. Chuleiin thlarau rama vuong insang hai hin ți ding an hriet ngai nawh. Damlaini tiem dan Lalpa’n anchuktir leiin hunthar a malsawmna a hung tlung pha khawmin a chim buoi ta nawh. A vuongna ram anhnuoi pha pha chun pansak panthlang hai țawng dan ti bak chu buoipui ding ei nei ngai nawh. Chuleichun, ei nun hi mi’n an tiembuoi el ni lovin ei ni meu khawmin ei tiem fuk thei ngai naw a nih. Ei ni rawi chu ei hang vuong dek dek a mi dang leh ei inkhak nghal el. Tuol tieng ruoițhe ni khuo a ei hang vuong dek dek a mi dang leh ei inkhak nghal hlak (Habakuk 3: 17-18).

Mu vanlai hi hang en tu, a hang vuong insang tak tak chu aw, a hlim hnuoi tieng a um a, Ar hai in a hlim an insuol pui a, ringtu hai thlarau rama Lalpa’n a min vuong tir phaa hrilsiet dem siet an I tum tak chu ei hlim a nih. Vuongna ram anhnuoi pha chun a tak an mi them fuk a eini ei na nawk el hlak a nih.  Chuleiin an mi themfuk tak chu ei hlimthla nisien la, a tak chu mi themfu naw hai sienla, chu dinga Lalpa’n ei thlarau hi mi dawm kang a tum hlak a nih.

Mu vanlai khawm chung tieng insang deuin a vuong a, a hlim hnuoi a an len vel a. Arpui lem chun ka nau a lak ding a ni a ti a, thi phuhakin an suol pui a, a tak an chuk fuk nawh, a ichuk fuk tak chu a hlim a nih. Chuleiin, ringtu hai thlarau rama an vuong insang pha chun dotu le suknatu hai suknat phak lo dingin Kristaa hin Lalpa’n a mi humhim a nih. Ei Pathien hming chu inpakin um raw seh.

Tirko Paula khan iengtin am a tia, a harsatna hai hlip kieng dingin Pathien kuomah vel tam a hni a, chulaia Lalpa rawl hung inlang chu “ka lunginsietna ita dingin a hun tawk ka thil thawtheina hi hrat nawna a inthawk a nih insawn naw sukfamkimin a um.”  Hrat nawna hmun a Pathien thil thawtheina suk famkim in a um. Philippi 4:13 a nun ram hin a chimbuoi ta ngai nawh. Rom lungin a Intang, harsatna chi dang dangin a tuom vel pa kha, pasietna hmun a hausakna thuruk, hausakna hmuna pasietna thuruk Lalpa’n an chuktir ta a nih. Chuleiin, Kohran hai hi Lalpa hmabulah tlulut mawl mawl ei tiu. Lalpa’n a thu malsawm raw seh.