BIBLE STUDY: Tu hun (Present) le la hung tlung ding (Future) “Intlanna Thu-ah”

By:- Rev. Fimchawnthang

Kristaa Ringtu hai nun tuta huna a tlung zing lai le la hung tlung ding thua hin ngaituo buoi thei ding tamtak a um leiin ei rama Pathien Thu hriltu hai le ngâitu hai lai inṭhena a um ta hlak leiin ziek ding tamtak um sienkhawm entirna angin pakhat ziek lang hang tum sin ei tih- (Pathien ringsanin)

“In tlanna,” Intlan tah ei nih. Ephesi 1:7 A thisen leiin amaa chun ei intlanna ei hmu a nih. A lunginsietna hau zie ang peia ei suol hai ngâidamna chu, Kolosa 1:14 Ama a chun ei intlanna ei hmu a nih. Ei suol hai ngâidamna chu.

Hieng Bible châng hai hi ei en chun intlan ei nina a hin a famkima Krista thina leia intlan chu ei ni a chieng a. Ei ni tieng mi phût lovin Lalpa’n Kristaa a thawsa a chun a min tlan el a na, chu chu ringtu chun Pathien Thlarau hrilfiena in ama nina ngei a nih, a lo hriet fie el ta hlak a lo nih.

Chu chu ring leia hlaw ni lovin Lalpa’n a min tlanna chu ei ring el lem a nih. Lalpa ngâidamna leh an zawm nghâl a nih. Intlanna a hin thlarau chau an tlan ni lovin, taksa khawm an tlansa a nih. 1Korinth 6:19 a chun, An leh intaksa chu in sûnga um, Pathien kuoma inthawka inhmu, Thlarau Thienghlim in a nih, ti inhriet naw maw, mâni ta khawm in ni ta naw a, mana inchâwk in nih in sawn naw – chuleiin intaksa chun Pathien châwimâwi ro,  ti a nih. Ei taksa hi ei ta ni ta lovin, mana inchâwk tasa a nih. Intlan ti le inchâwk ti hi thuhmun ni chie naw sienkhawm a umzie chu thuhmuna ngâi ding a nih. Ei taksa khawm intlansa a na, intlan a ni angin a la famkim naw a ni lem. Chuleiin, tuta ringtu hai ei ngîrhmuna hin intlansa ei nih. Ei taksa le ei thlarau a rengin Lalpa’n an tlansa a ni ta leiin ei nuom nuoma ei hmang el ding an ta nawh. Taksa intlan dingin Lal Isu thi nâwk ta naw nih, chatuona dinga vawikhata intlan a nih.

Intlan ding ei la nih :(Intlanna famkim chu) Rom 8:23 chu chau khawm chu ni lovin ei ni Thlarau râhmasa neitu hai ngêi khawm hin nau ei nina (Ei taksa intlanna) chu nghâkin eini meu khawm ei inrûm si a,  tiin ei hmu nâwk a, hi taka hin ei taksa intlanna chu hma tienga ding niin an lang chieng nâwk hle si a ni hih. Thlarau râhmasa neitu hai ei ni leiin râhmasa sîk ta chun busîkpui a um ding ti inhrietna a na, Thlarau râhmasa neitu, intlansa hai Rupture ah natna le lungngâina ichîm phâk ta lo naah lâklûta ei um ding hun chu ‘Taksa Intlanna Ni,’ tia nghâkin a um el lem a ni thu hrilna niin an lang lem a nih. Intlan lo intlanna ni lovin intlansa chu intlan a ni anga a famkimna hun ding hrilna a ni lem.

Ei mihriem hlui le a chunga thil ṭhalo po po hlip thlâka um hun ding hi ei nghâk chu a nih. Ephesi 4:30 Pathien Thlarau chu suk lungngâi naw ro intlanna nia dingin Amaa inchika in um kha, Thlarau chênchil ei ni a, chu Thlarau chu suk lungngâi lo ding a nih. Intlanna nia dinga min chiktu a nih.

Ephesi 1:14 Chu chu Pathien ropui zie inpâkna dinga ama ta ngêi hai a min tlan suok phaa ei rohluona dinga zakhamna a nih. Hieng Bible châng hai a hin ringtu hai Thlarau inthienga inchikna intlansa haia um chu a hril a, chu umzie chu an tlansa kha an umna hmun dinga a siena ding hun a la tlung hma in khawvêla a lan um tir a, a lâk suok hun ding chu intlanna ni tiin ei hmu a nih, “Intlansuok pha” a ti bawk a nih. Intlansa ei ni a, ei ram tieng ṭhuoi ei la ni naw leiin ei ram ngâi in ei inrûm a. Khawvela hin intlan ei nina lo sawr inla khawm, natna, lungngâina, thina le ṭapna, suol le buoina kara hun iemani chen ei um Lalpa’n a mi la phal pêk lei hin intlansa ni inla khawm ei ropuina ni a tlung hma hin ei la tuor hri ding a nih.

Sienkhawm ei khâtin ei tuor nawh, a min tlantu thlarau chu ei nia uma min chûktirin a mi ṭhuoi tlat leiin Lalpa inpâkin um sien. Khawvela inthawkin mi la ṭhuoisuok a ta, intlan ei ni ang takin famkim tâng ei tih. Ei tlantu chu hmu khawm hmu tâng ei tih.

Intlanna famkim chu ei chang ta a (Eini tieng panga). Tlansa hai ei la famkim naw a ni lem intlan tah niin intlanna niah intlan ei nina ang taka a famkimna ni ding chu ei nghâk a nih. Chu hun chu Rupture, mithienghlim lâwr tiin ei ko a nih. Krista hung nâwkna ni ei ti bawk, chuchu nghakin ei lan rûm hri a ni hih. Lalpa’n a thu malsâwm raw seh.