Baptistu Johan kha Zawlnei Elijah hung dinga ti chu a ni am?

By: Rev. Dr. Lalrosiem Songate
Hi thu hi tukum ei Sunday School subject Chanchin Ṭha Matthai ziek ah suklangin a um a, chun Inchuklaibu ziektu ka ni bawk leiin indawnna ka dawng zeu zeu hlak a. Inchuklai bu a khan hilai hrilfiena chipchier taka ziek dingin hmun a hluo rawn taluo inlau a um bawk leiin sui sei chuong loin ka hmu dan tawite chauin ka ziek lem a. Pathien nia Youtube a kan chuktirna a khan chipchier deu metin ka hrillang met a, amiruokchu chipchier zuolin hang ziek suok lem in la ti nuomna ka nei leiin ka hung ziek suok a nih.

Zawlnei Elijah hung nawk ding thu hi Thuthlung Hluia zawlnei Malaki 4:5 ah chau ei hmu a, zawlnei dang a hril an um nawh. An umnaw leia pawm lo ding tina ruok chu an naw a, a umzie suk chieng sap tu ding a um nawh ti thu a nih. Chun Baptistu Johan pieng ding thu vantirkoin a pa Zakaria  kuoma a hrilna a chun hieng hin a hril a, “Chun pahai lungril chu nauhai tienga innghattir ding dam,mi kawmawhai chu mi feltak varna tienga innghattir ding dam, Lalpa ta dinga mihai lo buotsai dingin Elijah lungril le thilthawtheina putin Lalpa hmaah fêng a tih,” (Luka 1:17) ti ei hmu a. Chun Lalpa Isu ngeiin Baptistu Johan chungthu a hrilna ah, “In awi nuom chun, chu chu Elijah, a hung ding chu a nih.” (Matth.11:14) tiin a hril a. Chun Matthai bawk bung 17:10-13 inkar sung khan Elijah hung ding thu a inchuktirhaiin an indawnna a hrilfie zo chun, “Chu phing le chun inchuktirhai chun, Baptistu Johan thu an kuomah a hril a ni ti an lo hriet ta a.” (Matth.17:13) tiin a ziek nghe nghe bawk a nih. Hienghaia inthawkin vantirko le Isu chun Baptistu Johan hi Elijah a nih, an ti niin an lang.

Chun Chanchin Ṭha Johan 1:19-28 sunga hin Jerusalema Judahaiin thiempuhai chu Baptistu Johan hi tum a ni chie indawn fel dingin an tir a. An thu indawn chu pathum a nih- 1) Krista chu i ni?  2) Elijah chu i ni?  3) Zawlnei chu i ni? Hienghai hi Thuthlung Hlui zawlneihaiin la hung dinga an hrillâwk, Judahai khawma an ilo tûnghai chu an nih. Krista hung ding le Elijah hung ding thu hrillawknahai chu ei chieng sa ah gai ei ta, zawlnei hung dinga hrillawkna an lo tûng em em chu Deut.18:15, 18-19 a mi a ni a, hihi Isu hung ding thu Mosiein a hrillawkna a ni zie Thilthawhai 7:37 le 3:19-23 a hai ei hmu thei. Chu umzie chu Zawlnei hung dinga hrillawka um hi tudang niloin Isu hung ding thu a hrilna a nih.

Judahai chun Baptistu Johan chu Krista i ni am, ti le Elijah hung hawk ding chu i ni am, annawleh, zawlnei hung dinga ti kha i ni am? tiin an indawn a, ama chun a ninaw thuin a dawn vawng a nih. Isu Krista hlak chun Elijah hung ding hrillâwka um kha Baptistu Johan hi a nih, a ti bawk si. A tu ti hi am indik lem tang an ta?

An ti hi an dik ve ve a, chu chu ei hrietthiem theina dingin zawlnei Malaki hrillawkna kha hi hun lai hin thlûr hni in a fe ti ei hriet a ṭha. Thlûr khatna chu vantirko le Isu Krista hril dan a ni a, a thlûr dang chu Dan inchuktirtuhai hril dan a nih. Zekaria kuoma vantirko thuhril le Isu Krista in Baptistu Johan hi Elija a ni dan an hrilna hai kha ei en chun Baptistu Johan hi zawlnei Elijah a ni dan chu taksa a hung piengnawn zawng niloin a rawngbawlna thlura enin Elijah rawngbawlna le inzûla rawngbawlna a nei ding zie tina lem a ni a. Dan inchûktirtuhai hril dan ruok chu zawlnei Elijah kha taksa ngeia la hung nawk ding anga inchûktirna a nih. Judahaiin Isu kha an ring theinawna san lien tak pakhat khawm Krista hung hmain Elijah hi hung dinga zawlneihaiin an hrillawk a ni leiin Elijah an la hmunaw tlat leiin Isu kha an ring theinaw a nih. Baptistu Johanin Judahai indawnna a dawna Elijah a ninaw thu a hril kha Dan inchuktirtuhai hrilfie dan anga taksa a Elijah hung nawk a ninaw zie a hrilna a nih. Chu bak ah Baptistu Johan khan mihai Isu Krista khîkhmutu ding a ni zie an hriet zing leiin ama chanchin hril rawn kha a nuom ngainaw hrim hrim bawk a nih.

Taksa a Elijah hung nawk ding ti hi Judahai Dân inchuktirtuhai hril dan a ni bak ah eini lai khawm Bible thu “Mihriem ta dingin vawikhat thi ruot a nih…” (Heb.9:27) ti ṭhangsan a, Elijah khawm hnuoia hung nawka la hung thi nawk kher kher dinga ngaina nei pawl khawm ei um hlak. Enok khawm thina intem loin Pathienin vantieng a ṭhuoi a, a hung thi nawk ding thu iengkhawm hrilin a um nawh. Chuong ta nekin hieng hi eini ringtuhai mithienghlim lâwr huna dama lo la umhai thina intem loa vana zuk laka ei la um ding (I Thess.4:16-17) thu entirna lem a ni ti ei hriet a ṭha.

Amiruokchu, Elijah hung nawkna ding thua ngaidan dang um nawk chu Isu a hung vawikhatna ah Baptistu Johan hmangin Elijah kha a lo hung a, a hung nawk vawihnina a khawm Elijah bawk a hung hmasa nawk ding a nih, tia hril pawl an um a, chuhai laia pakhat chu St. Augstine khawm kha a ni ve a nih. Dan inchuktirtuhai hin Pathien thu an lak dan hrim hrim khawm an lak suol nasa em em a, Isu khawma a kawk rawnna tak khawm a ni hrim a nih. Isu hi Krista a ni ti awi harsa an tina khawm an lo beisei anga Rom sawrkar hung tukdawl a, Israel Lalram hung indin ding zawnga an lo beisei leiin an awi thei hlawlnaw a ni kha. Chu belsa dingin Krista hma a zawlnei Elijah taksa a hmu phet phet an lo tum nawk bawk kha a na. An lo daw suol nasa bawk a nih.

Iengpo khawm nisien, ngaidan ei siem ding chun a him thlak tak chu vantirko hril dan le Isu hrildan hi an ang a, Dan inchuktirtuhai chu mihriem an na, an ngaidan khawm suol thei a ni bawk leiin Isu le vantirko hrildan angin Elijah hung dinga ti kha taksa a hung ngei ding tina niloin Elijah ang rawngbawlna nei a, Elijah thlarau chang ang changa rawngbawlna Baptistu Johanin a hung nei ding thu hrilna ah ngai in la a him tak awm ie.

Zawlnei Elijah le Baptistu Johan an mihriemna le an rawngbawlna thlûra an inzûlnahai Luka zieka vantirko thuhrilhai ṭhangsanin hang en ei tih. A pakhatna ah Pathien thlaraua sip ve ve an nih. Baptistu Johan lem chu a nu phing sunga a um laia inthawka sip ṭan an tah (Luka 1:15). A pahnina ah Elijah chu Israel hnam pumpui an hnungtawl nawk hnunga Pathien kuom tienga ṭhuoikir nawk tu a nih. Chuong ang bawkin Baptistu Johan khawm “Israel thlahai tamtak Lalpa an Pathien kuom tieng innghattir nawk” (Luka 1:16) a nih. A pathumna ah Baptistu Johan hi “Lalpa ta dinga mihai lo buotsai dingin Elijah lungril le thilthawtheina putin Lalpa hmaah feng a tih,” (Luka 1:17) ti a ni bawk a nih.