Aw Nang Ringtu, Krista Lungril Ang I Nei Am? (Phil. 2:5-8)

By:- Pastor Dr. Lalbiekthang Buhril

Krista lungril chu iem ning a ta?

– Krista lungril chu hmangaina lungril a nih (Phil.2:1,2)
– Krista lungril chu thuhnuoirawlna le midang hai ngaisakna hi a nih (2:3,4)
– Krista lungril chu inngaitlawmna nun nei hi a nih (2:6-8)
– Krista lungril chu Suok ni na (Servanthood) a nih ( Phil. 2:5-7)
– Krista lungril chu Pathiena innghatna hi a nih (Lk. 22:42)

Tirko Paula chun Philippi mihai chu : –

1. Mani hmasiel le lungril ṭhalo nei lo dingin
2. Lungrila inngaitlawma mani neka midanghai ṭha lema ngai thei dingin
3. Mani chau inngaisak loa midanghai ngaisakna khawm nei dingin anfui mawl mawl a nih.

Anni Philippi mi hai ta ding chaua infuina hi pêk an nawh ti hi Ringtu haiin ei hriet hi a pawimaw em em.

Mi’n Lalpa ṭia a hmabula an ngaitlawm chun ‘’Hausaknahai le Inzakaina le Hringna’’ chu ei lawmman dingin a mi tiem a nih (Thuvarhai 22:4).

“Tukhawm hi Naupangte anga inngaitlawm taphawt, ama chu Vanramah chun ropui tak a tih” a ti bawk a nih (Mt.18:4).

Suok ṭha chun mani ṭhatna nekin midang hai ṭhatna ding a ngaituo lem hlak.

Chuong ani si chun Krista lungril chu I nei ve am leh?

– Ei nina le neina hai hi midang hai sukna le hnengde na, chapo puiin ei uongpui hlak am?
– Midanghai neka inngai hlu bîk le chunghnung lema inngaina I nei hlak am?
– I laka suksuoltuhai ngaidam thei lo riu I nei hlak am?
– Rethei le harsa, riengvai le chanhai, misuol le sandam la ni lo hai hmangaina I nei am?

Aw nang Ringtu, hieng ang lungril hi I lo la nei ngai naw ani chun Nazareth Isu, Thingrem siemtupa naupa, kum 2000 chuong dei liem tah a i la hmu ngai naw Isu Krista chu iengtin am hmangai thei i ta? Krista ka hmangai ti zing siin nang le nang inhlêm zing a nih. Chuleiin unau, nakie ti loin tuhin Lalpa kuomah thlulut el rawh.

Krista inngaitlawm anga inngaitlawm dinga ko ei ni leiin ei tisa nun peithla a ama hmabula eiin surrender a ṭul a nih.

Sandam ni hnung khawmin ieng ieng thil leiin amanih tisa dân anga um nawk el hi a lo awl hlak leiin nitin, darkar tina Lal Isu Krista lungril ang ei put theina dingin mani tieng khawm theitâwpa ṭhang la a suol ei do hi a pawimaw takzet a nih.

Ei Lalpa Isu khawvela a hung lai khan nei hrim hrim a nei naw ni kha tie. Hei ngaituo ta –

1. Piengna dingin Ran In, Mi Ran bu pekna In a haw ni kha
2. Thuhrilna dingin mi Lawng a haw a
3. Chuongna dingin mi Sabengtung a haw a
4. Zanbu nuhnung kîlna dingin mi inchungsâwng a haw a
5. A thia, phûma a um na dingin mi thlân a haw a ni kha tie a van rieng lawm lawm ngei deh maw…

Hang inngaituo ta um ie, iengam in iempuia chapo pui ding ei nei leh? Chuong hai po po ku chu Lal Krista hmel hlietu, mihaiin eini ah Krista chanchinṭha, muongna le hadamna an hmu thei ngai nawna chu a lo ni zing hlak annawm. Chuleiin chapona silfen ei inthuom zingna hai pei hmang ei ta, Krista lungril ang inngaitlawmna le thuhnuoirawlna a inthuom dingin insiem fel ei tiu khai.

Lalpa hma a insukruoka, in surrendera, Lalpa I thu ang peiin ni raw seh tia Lalpa kuomah ei intuklut ani phawt chun ei Insung, ei Kohran, ei Khawtlang, Ram le Hnam khawm a dam ngei ding a nih.

Aw Ringtu, Krista lungril, hmangaina, thuhnuoirawlna, zaidaw theina, mani neka midang hai ṭha lema ngai theina hai nei loa I um ani chun Pathien le inkâr in enfel dingin ei infiel nghal a nih.