A Hminga Isu (Matthai 1:21)

By:- Rev. Zakapṭhuom

“Naupasal nei a ta, a hminga Isu sak I tih; ama chun a mihai an thil suksuolnaa inthawkin a sandam ding a ni si a”

Hi thu hi ei hriet seng angin Vantirko-in Josef kuoma a hril a nih. Khâng lai khan Josef kha a lungril buoiin na ngawt a ti maw? A nuhmei huol Mari’n mi dang a inthawkin nâu a vawn ti a hriet ta âwm si a. Chuonga lungril buoi taka a um lâi vêl chun a mang tieng a inthawkin a nuhmei huol Mari chu pasal dang laka changsuol ni lovin Thlarau Thienghlim laka mi, Pathien remruot a chunga hung tlung a ni thu inhriettir-in a um ta a. Vantirko-in an hriettir dâna chun Mari a inthawka nâu pieng ding chu a hminga ISU i sak ding a ni a ti a nih. Vantirko-in a hril ang tak chun a hminga Isu a sak ta a.

Josef  thil tuok ang hin Krismas a hung tlung ding hin lungril sâwlna ding le natna ding a tam bik amani ti dingin a um hlak. Lusûn hai ta dingin khawsâwt zuol hun, pasie hai ta dingin pasiet pawi zuol hun, nâupang thuomhnaw man ding le Krismas thawlâwm ding ngaituo ṭûl bawk, a va buoithlak de aw! Anachu maw, a hming Isu ei nei an nâwm. Ama chun, ei thil suksuolna a inthawk chauvin a mi sandam nawh. Ei khawsawtna a inthawk dam, pasiet leia ei inrûmna a inthawk khawmin a mi sandam thei, a hminga Isu ei nei tlat an nâwm.

Hming: Hming hi umzie neia sak a ni rawp hlak. Kei khawm ka hming hi umzie neia sak a ni ve a. Ka pu hin sa 300 (zathum) chuong a kâp a, a tupa ka hung pieng hin Zakâpṭhuom tiin ka hming a lo sak a nih. Hming hi umzie neia sak nisienkhawm, a puttû tak ruok chun hming saksan put zo lo tamtak ei um awm ie. Kei khawm hi sa zathum chuong kâp hming put inlakhawm zathum chu hnailo, sawmhni bâk ka la kâp nawh. Lalsandam nisi ni tina inrui dâm, ṭantu ding khawm a hmang tlâk lo khawm an um thei âwm ie.

Lal Isu ruok chu chuong ang chu a ni ve nawh. Isu ti hi (Pathien chu Sandamna a ni/Pathien-in a sandam tina a nih) a takin hmu theiin a um a, a rawngbâwl tîra inthawkin Ama leiin damnaw hai an dam a, phâr hai sukthiengin an um a, kebâi hai kê-in an lâwn a, mitdel hai mit a lo var a, mithi khawm kei thovin an um. Pathien chu thlarau sandamtu chau ni lovin taksa sandamtu a ni zie khawvela a chengpui hai chun an mit-in an hmu a, a takin an chang a nih.

Isu Sandamna Maktak Chu: Isu sandamna hin makna danglam tak a nei, “A mi hai an thil suksuolnaa inthawkin a sandam ding a ni si a” ti chu a takin a sandam a nih. Hlepru hmang ‘mi suol’ an ti ha’n suol simin suol laka inthawkin damna an chang a, “Ka sum zatve pasie hai kuoma peng ka ta, tû chunga khawm thil iengkhawm lo hlepru ka ni chun a let li’n thung nâwk ka tih”, tiin hleprûkna a inthawkin damna an chang a nih.

Intheida hai khawm ISU leiin an lo inrem ta a, Herod le Pilat khawm a hma a inrem thei lo kha an inkâra Isu an lâwn leiin an lo inrem ta ti ei hmuh, vawisûn chen hin Lal Isu leiin, zu ngawlvei, drug ngawlvei hai an hung dam nawk a. Misuol le nunrâwng tak hai khawm mi dang rawngbâwl pêktu a an lo ṭhang thei ta a. Mi du-âm le fâkrûk chîng hai mi ring-um le tiktlâi taka hung inchangin an nei sum hai Pathien hming leiin an sêngral a. Lungril tieng damna, nun suol a inthawka damna, damna famkim chu vawisûn chenin Isu zarin ei la chang pei a ni hi. “A hminga Isu I sak ding a nih”, chu hming chu LALSANDAM tina a ni chu!

Unâuhai, vawisûna ei damna ve hin nitina ei thawsuol laka sandamana a mi’n tlun phâk am le? Chu chu Lal Isu sandamna chu a ni. Biekin a ei hlim vieu lai hin hmun danga ei thil suksuol a la pângngâi zing am? Ei sandamna chang hin ei nunsiet dâm, ei hrângsiet dâm a inthawk hin a mi sandam am? Damtak tak si lo hin ruolṭha zâra hlimna hi ei lo chên ve el a ni chun inngâituo chieng ngâi a ti ie.

Ṭhenkhat chu Zu châkna a inthawk dâm, Drugs châkna a inthawk dâm, sum-le-pai du-âmna a inthawk dâm, tisa châkna a suola inthawk dâm, Krismas boruok leia khawsawtna a inthawk damin sandam ngêi ngêi ei tih. Chuong ang chu ei lo um a ni khawma Isu hin a mi sandam hne vawng a ni. Chuleiin, tukum Krismas chu Bethlehem chenin fêng ei ta, a tuomna puon chau ni lovin a Isu ngei hmu tum ei ta sandam ei ngâina po pova a mi lo sandam ding an nâwm. Lalpa’n a thu malsâwm raw se.